నా హృ(మ)ది లో ...

మానస వీణకు తీగెలు సరిచేసి
స్వరాలు కూరుద్దామని కూర్చున్నా
సంధ్యా సాగరపు ఒడ్డున
అప్పుడప్పుడు పాదాలు స్పృశించే
అలల చిరుతాకిడి  చెంతన
మనసు నా వశం కావటం లేదు
సరిగమలు పలికిస్తున్నంతలో
ఉవ్వెత్తున సవ్వడి చేస్తూ కెరటాలు
ఎక్కడికో వెళ్లాలని
సముద్రుని విడిచి ఎగరాలని
అంతలోనే మళ్ళీ వెనక్కి
నా ఆలోచనలు అంతే

ఓ వరుసలో కూర్చి పాటగా పలికిద్దామన్నా 

పల్లవులను కూర్చి గొంతెత్తి పాడుదామన్నా
ఏవో సంక్లిష్ట సంకేతాలు
మరేవో అస్పష్ట సంగీతాలు
నా మనో సాగరాన ఒక్కోసారి నెమ్మదిగా
ఇంకోసారి ఉధృతంగా విరుచుకుపడే స్థాయిలో
ఏవేవో ఒత్తిడులు
మరేవో బంధాలు
ఒత్తిడులనుండి కొన్ని దృశ్యాలు
బంధాలనుండి మరిన్ని చిత్రాలు
కాని కెరటాల్లా కాకూడదు నావి
నిగ్రహంతో లక్ష్యాన్ని ఢీకొనాలి
తీగెలు సరిచేస్తూ కాలం గడిపేయకూడదు.
గుర్రపు గిట్టల బలంతో విచారపు
గతాన్ని వెనక్కి తన్ని
వర్తమానపు సంకేతాలను మోసుకుంటూ
భవిష్యత్ ఛాయాపథం లోకి దూసుకెళ్ళాలి.
తేనె లొలుకు తెనుగుకు మాలలు కట్టి
తీయనైన పాటలతో హారతి పట్టి
ముందుకు మున్ముందుకు వెళతాను
కష్ట జీవి స్వేదంతో నేను కలిసిపోతాను
కార్మికుడి కన్నీటిలో లీనమౌతాను
అనాధ నేత్రాలకు వెలుగౌతాను
ఇదంతా కేవలం భావోద్వేగం కాదు
నా హృదిలోని  స్పందనలు
నా మదిలోని   భావనలు